نظر نے کر دیا غائب دکھایا دل نے جو جلوہ (ردیف .. ا)

نظر نے کر دیا غائب دکھایا دل نے جو جلوہ

بظاہر ہے جو بینائی حقیقت میں ہے وہ پردہ

اسے ڈھونڈیں کہاں کوئی نہیں جس کا نشاں کوئی

ہجوم نور ہے وہ نور کا کیا نقش کیا چہرہ

ہوئے بے ہوش سب کے سب ہوا جن پر بھی ظاہر وہ

تو پھر جلوہ کوئی اس کا بیاں کرتا تو کیا کرتا

مکین ہر مکاں کہیے یا کہیے لامکاں اس کو

ہے ہر گھر میں نہیں لیکن کسی گھر میں سما سکتا

وہی نظریں وہی ناظر وہی خود ہر نظارہ ہے

کہ ہے کل قدرت قادر کرشمہ اس کی وحدت کا

صداؔ سب منحصر ہے دیکھنے والی نگاہوں پر

کسی کو حاضر و ناظر کسی کو ہے گماں لگتا