نظر نیچی کیے گزرے جہاں سے

نظر نیچی کیے گزرے جہاں سے

کبھی پوچھا نہیں کچھ آسماں سے

گزر کر آ گئے ہیں جسم و جاں سے

ہماری گفتگو ہے رفتگاں سے

جسے کرنا ہو ترک بادہ کر لے

ہمیں کہنا نہیں کچھ بے دلاں سے

سگ دنیا ہیں لیکن بے محابا

ہم اٹھ جائیں گے تیرے آستاں سے

محبت کی زباں ہے صاف و سادہ

اسے رشتہ نہیں کچھ این و آں سے

اسی عیار کے بہروپئے سب

نکل کر آ گئے ہیں داستاں سے

ہوائے تند کیونکر آ رہی ہے

یہ کیسے آ رہی ہے گلستاں سے

سکوت و خامشی و سرگرانی

یہی رشتہ ہے میرا جان جاں سے

نہ حاضر ہے نہ غائب ہے کہاں ہے

پتہ پوچھا کرو اب پاسباں سے

کہاں ہو دفن پوشیدہ کہاں ہو

یہ ہم پوچھیں گے میرؔ بے نشاں سے

خیال خاطر احباب کرنا

کوئی کہتا انیسؔ سر گراں سے