nazar nichi kiye guzre jahan se

nazar nīchī kiye guzre jahāñ se

kabhī pūchhā nahīñ kuchh āsmāñ se

guzar kar aa ga.e haiñ jism-o-jāñ se

hamārī guftugū hai raftagāñ se

jise karnā ho tark-e-bāda kar le

hameñ kahnā nahīñ kuchh be-dilāñ se

sag-e-duniyā haiñ lekin be-muhābā

ham uTh jā.eñge tere āstāñ se

mohabbat kī zabāñ hai sāf-o-sāda

use rishta nahīñ kuchh īn-o-āñ se

usī ayyār ke bahrūpiye sab

nikal kar aa ga.e haiñ dāstāñ se

havā-e-tund kyūñkar aa rahī hai

ye kaise aa rahī hai gulsitāñ se

sukūt-o-ḳhāmushī-o-sargirānī

yahī rishta hai merā jān-e-jāñ se

na hāzir hai na ġhā.eb hai kahāñ hai

pata pūchhā karo ab pāsbāñ se

kahāñ ho dafn poshīda kahāñ ho

ye ham pūchheñge 'mīr'-e-be-nishāñ se

ḳhayāl-e-ḳhātir-e-ahbāb karnā

koī kahtā 'anīs'-e-sar-garāñ se

nazar nichi kiye guzre jahan se

kabhi puchha nahin kuchh aasman se

guzar kar aa gae hain jism-o-jaan se

hamari guftugu hai raftagan se

jise karna ho tark-e-baada kar le

hamein kahna nahin kuchh be-dilan se

sag-e-duniya hain lekin be-muhaba

hum uTh jaenge tere aastan se

mohabbat ki zaban hai saf-o-sada

use rishta nahin kuchh in-o-an se

usi ayyar ke bahrupiye sab

nikal kar aa gae hain dastan se

hawa-e-tund kyunkar aa rahi hai

ye kaise aa rahi hai gulsitan se

sukut-o-KHamushi-o-sargirani

yahi rishta hai mera jaan-e-jaan se

na hazir hai na ghaeb hai kahan hai

pata puchha karo ab pasban se

kahan ho dafn poshida kahan ho

ye hum puchhenge 'mir'-e-be-nishan se

KHayal-e-KHatir-e-ahbab karna

koi kahta 'anis'-e-sar-garan se