nazar paDa ek but-e-pari-wash nirali saj-dhaj nai ada ka

nazar paḌā ik but-e-parī-vash nirālī saj-dhaj na.ī adā kā

jo umr dekho to das baras kī pe qahr o aafat ġhazab ḳhudā kā

jo ghar se nikle to ye qayāmat ki chalte chalte qadam qadam par

kisī ko Thokar kisī ko chhakkaḌ kisī ko gaalī nipaT laḌākā

gale lipaTne meñ yuuñ shitābī ki misl bijlī ke iztirābī

kahīñ jo chamkā chamak chamak kar kahīñ jo lapkā to phir jhapākā

ye chanchalāhaT ye chulbulāhaT ḳhabar na sar kī na tan kī sudh-budh

jo chīrā bikhrā balā se bikhrā na band bāñdhā kabhū qabā kā

laḌā de āñkheñ vo be-hijābī ki phir palak se palak na maare

nazar jo nīchī kare to goyā khilā sarāpā chaman hayā kā

ye raah chalne meñ chanchalāhaT ki dil kahīñ hai nazar kahīñ hai

kahāñ kā ūñchā kahāñ kā nīchā ḳhayāl kis ko qadam kī jā kā

ye rum ye nafrat ye duur khiñchnā ye nang āshiq ke dekhne se

jo pattā khaTke havā se lag kar to samjhe khaTkā nigah ke pā kā

jatāve ulfat chaḌhāve abrū idhar lagāvaT udhar taġhāful

kare tabassum jhiḌak de har dam ravish haTīlī chalan daġhā kā

na vo sambhāle kisī ke sañbhle na vo manā.e mane kisī se

jo qatl-e-āshiq pe aa ke machle to ġhair kā phir na āshnā kā

jo shakl dekho to bholī bholī jo bāteñ suniye to mīThī mīThī

dil aisā patthar ki sar aḌā de jo naam liije kabhī vafā kā

'nazīr' haT jā pare sarak jā badal le sūrat chhupā le muñh ko

jo dekh levegā vo sitamgar to yaar hogā abhī jhaḌākā

nazar paDa ek but-e-pari-wash nirali saj-dhaj nai ada ka

jo umr dekho to das baras ki pe qahr o aafat ghazab KHuda ka

jo ghar se nikle to ye qayamat ki chalte chalte qadam qadam par

kisi ko Thokar kisi ko chhakkaD kisi ko gali nipaT laDaka

gale lipaTne mein yun shitabi ki misl bijli ke iztirabi

kahin jo chamka chamak chamak kar kahin jo lapka to phir jhapaka

ye chanchalahaT ye chulbulahaT KHabar na sar ki na tan ki sudh-budh

jo chira bikhra bala se bikhra na band bandha kabhu qaba ka

laDa de aankhen wo be-hijabi ki phir palak se palak na mare

nazar jo nichi kare to goya khila sarapa chaman haya ka

ye rah chalne mein chanchalahaT ki dil kahin hai nazar kahin hai

kahan ka uncha kahan ka nicha KHayal kis ko qadam ki ja ka

ye rum ye nafrat ye dur khinchna ye nang aashiq ke dekhne se

jo patta khaTke hawa se lag kar to samjhe khaTka nigah ke pa ka

jatawe ulfat chaDhawe abru idhar lagawaT udhar taghaful

kare tabassum jhiDak de har dam rawish haTili chalan dagha ka

na wo sambhaale kisi ke sanbhle na wo manae mane kisi se

jo qatl-e-ashiq pe aa ke machle to ghair ka phir na aashna ka

jo shakl dekho to bholi bholi jo baaten suniye to miThi miThi

dil aisa patthar ki sar aDa de jo nam lije kabhi wafa ka

'nazir' haT ja pare sarak ja badal le surat chhupa le munh ko

jo dekh lewega wo sitamgar to yar hoga abhi jhaDaka