nazar pe baiTh gaya jo ghubar kis ka tha

nazar pe baiTh gayā jo ġhubār kis kā thā

diloñ se kam na huā jo sharār kis kā thā

na koī shakl thī dil meñ na lab pe naam koī

tamām umr mujhe intizār kis kā thā

mire liye to vo Thahrā na ek pal-bhar ko

na jaane qāfila-e-nau-bahār kis kā thā

ye kis ke husn se yādoñ kī ban ga.ī tasvīr

dil-ā.ine pe sunahrā ġhubār kis kā thā

paḌe raheñge isī soch meñ qayāmat tak

hamāre ba.ad dil-e-be-qarār kis kā thā

ḳhayāl-o-ḳhvāb kī rātoñ se jo ubhartā hai

vo ek nuur badan kā nikhār kis kā thā

vo adh-khulā sā darīcha vo chaah kī ḳhushbū

mirā nahīñ thā to phir intizār kis kā thā

ye kis ne shor-e-salāsil ko naġhmagī de hī

rah-e-vafā meñ qadam baar baar kis kā thā

tumhāre jabr kī tā.īd thā mirā manshā

samajh meñ aa na sakā iḳhtiyār kis kā thā

ye kis liye sū-e-gul bhī nigāh jaatī thī

tum aa chuke the to phir intizār kis kā thā

mirī vafā kā bagūla to ek thā lekin

mire sivā sar-e-sahrā ġhubār kis kā thā

bahut dinoñ se yahī ik savāl hai dil meñ

jo maiñ ne sab ko diyā thā vo pyaar kis kā thā

'munīr' jab bhī chale koī rāsta na milā

vajūd-e-rāhguzar e.atibār kis kā thā

nazar pe baiTh gaya jo ghubar kis ka tha

dilon se kam na hua jo sharar kis ka tha

na koi shakl thi dil mein na lab pe nam koi

tamam umr mujhe intizar kis ka tha

mere liye to wo Thahra na ek pal-bhar ko

na jaane qafila-e-nau-bahaar kis ka tha

ye kis ke husn se yaadon ki ban gai taswir

dil-aine pe sunahra ghubar kis ka tha

paDe rahenge isi soch mein qayamat tak

hamare baad dil-e-be-qarar kis ka tha

KHayal-o-KHwab ki raaton se jo ubharta hai

wo ek nur badan ka nikhaar kis ka tha

wo adh-khula sa daricha wo chah ki KHushbu

mera nahin tha to phir intizar kis ka tha

ye kis ne shor-e-salasil ko naghmagi de hi

rah-e-wafa mein qadam bar bar kis ka tha

tumhaare jabr ki taid tha mera mansha

samajh mein aa na saka iKHtiyar kis ka tha

ye kis liye su-e-gul bhi nigah jati thi

tum aa chuke the to phir intizar kis ka tha

meri wafa ka bagula to ek tha lekin

mere siwa sar-e-sahra ghubar kis ka tha

bahut dinon se yahi ek sawal hai dil mein

jo main ne sab ko diya tha wo pyar kis ka tha

'munir' jab bhi chale koi rasta na mila

wajud-e-rahguzar eatibar kis ka tha