nazar se dur rahe ya nazar ke pas rahe

nazar se duur rahe yā nazar ke paas rahe

hamesha ishq ke mausam bahut hī ḳhaas rahe

maiñ tere zikr kī vaadī meñ sair kartā rahūñ

hamesha lab pe tire naam kī miThās rahe

ye iztirāb junūñ ko bahut akhartā hai

ki tum qarīb ho tan par koī libās rahe

vo rū-ba-rū the to āñkhoñ se daur chal nikle

khulī na botaleñ ḳhālī sabhī gilās rahe

ye baat raaz kī daadī ne ham ko batlā.ī

hamārī umr meñ abbā bhī devdās rahe

maiñ kahkashāoñ meñ ḳhushiyāñ talāshne niklā

mire sitāre mirā chāñd sab udaas rahe

maiñ muntazar huuñ kisī aise vasl kā jis meñ

mire badan pe tire jism kā libās rahe

tirī hayāt se juḌ jā.ūñ vāqi.a ban kar

tirī kitāb meñ merā bhī iktisāb rahe

nazar se dur rahe ya nazar ke pas rahe

hamesha ishq ke mausam bahut hi KHas rahe

main tere zikr ki wadi mein sair karta rahun

hamesha lab pe tere nam ki miThas rahe

ye iztirab junun ko bahut akharta hai

ki tum qarib ho tan par koi libas rahe

wo ru-ba-ru the to aankhon se daur chal nikle

khuli na botalen KHali sabhi gilas rahe

ye baat raaz ki dadi ne hum ko batlai

hamari umr mein abba bhi dewdas rahe

main kahkashaon mein KHushiyan talashne nikla

mere sitare mera chand sab udas rahe

main muntazar hun kisi aise wasl ka jis mein

mere badan pe tere jism ka libas rahe

teri hayat se juD jaun waqia ban kar

teri kitab mein mera bhi iktisab rahe