نظر شائستہ غم ہو رہی ہے

نظر شائستہ غم ہو رہی ہے

مگر پہچان اپنی کھو رہی ہے

فراق دوست کی یہ آخری شب

نہ جانے کب کی نیندیں سو رہی ہے

جسے گستاخ ہو جانا روا تھا

وہ آنکھ اب تک قصیدہ گو رہی ہے

بڑی جوکھم ہے تھوڑا فاصلہ بھی

مسافت جاں بہ جاں طے ہو رہی ہے

یہ سارا تجزیہ یہ بحث و تکرار

ہوس پشتارے کیا کیا ڈھو رہی ہے

یہاں سے اٹھ کے جانا سانحہ تھا

یہاں آ کر بھی وحشت ہو رہی ہے

زمستاں ہے تری یادوں کا موسم

بہت مصروفیت ہم کو رہی ہے

لپیٹے عذر میں اپنے مہ و سال

گئے موسم کی چاہت سو رہی ہے

ترے غم سے کہ ہے اب یوں گریزاں

ہماری واقفیت تو رہی ہے

جہاں میلوں نہیں کوئی پڑوسی

خزاں کیوں کشت لالہ بو رہی ہے

سر آب رواں بد احتیاطی

دھلے دھبوں کو پھر سے دھو رہی ہے

اکیلے تھے تو جی لگتا نہیں تھا

مگر اب شام رسوا ہو رہی ہے

ہلا کر شور گریہ سے زمیں کو

پس دیوار خلقت سو رہی ہے

بدل کر رنگ رخ شاہینؔ اپنا

یہ شب بے مایہ کتنی ہو رہی ہے