nazar shaista-e-gham ho rahi hai

nazar shā.ista-e-ġham ho rahī hai

magar pahchān apnī kho rahī hai

firāq-e-dost kī ye āḳhirī shab

na jaane kab kī nīñdeñ so rahī hai

jise gustāḳh ho jaanā ravā thā

vo aañkh ab tak qasīda-go rahī hai

baḌī jokhim hai thoḌā fāsla bhī

masāfat jāñ-ba-jāñ tai ho rahī hai

ye saarā tajziya ye bahs-o-takrār

havas pushtāre kyā kyā Dho rahī hai

yahāñ se uTh ke jaanā sāneha thā

yahāñ aa kar bhī vahshat ho rahī hai

zamistāñ hai tirī yādoñ kā mausam

bahut masrūfiyat ham ko rahī hai

lapeTe uzr meñ apne mah-o-sāl

ga.e mausam kī chāhat so rahī hai

tire ġham se ki hai ab yuuñ gurezāñ

hamārī vāqafiyyat to rahī hai

jahāñ mīloñ nahīñ koī paḌosī

ḳhizāñ kyuuñ kisht-e-lāla bo rahī hai

sar-e-āb-e-ravāñ bad-ehtiyātī

dhule dhabboñ ko phir se dho rahī hai

akele the to jī lagtā nahīñ thā

magar ab shaam rusvā ho rahī hai

hilā kar shor-e-girya se zamīñ ko

pas-e-dīvār ḳhilqat so rahī hai

badal kar rang-e-ruḳh 'shāhīn' apnā

ye shab be-māya kitnī ho rahī hai

nazar shaista-e-gham ho rahi hai

magar pahchan apni kho rahi hai

firaq-e-dost ki ye aaKHiri shab

na jaane kab ki ninden so rahi hai

jise gustaKH ho jaana rawa tha

wo aankh ab tak qasida-go rahi hai

baDi jokhim hai thoDa fasla bhi

masafat jaan-ba-jaan tai ho rahi hai

ye sara tajziya ye bahs-o-takrar

hawas pushtare kya kya Dho rahi hai

yahan se uTh ke jaana saneha tha

yahan aa kar bhi wahshat ho rahi hai

zamistan hai teri yaadon ka mausam

bahut masrufiyat hum ko rahi hai

lapeTe uzr mein apne mah-o-sal

gae mausam ki chahat so rahi hai

tere gham se ki hai ab yun gurezan

hamari waqafiyyat to rahi hai

jahan milon nahin koi paDosi

KHizan kyun kisht-e-lala bo rahi hai

sar-e-ab-e-rawan bad-ehtiyati

dhule dhabbon ko phir se dho rahi hai

akele the to ji lagta nahin tha

magar ab sham ruswa ho rahi hai

hila kar shor-e-girya se zamin ko

pas-e-diwar KHilqat so rahi hai

badal kar rang-e-ruKH 'shahin' apna

ye shab be-maya kitni ho rahi hai