نظر تو آتے ہیں لیکن نشاں نہیں رکھتے

نظر تو آتے ہیں لیکن نشاں نہیں رکھتے

مکان رکھتے ہوئے بھی مکاں نہیں رکھتے

تمام حکم انہی کا انہی کے سارے سخن

زباں انہی کی مگر وہ زباں نہیں رکھتے

ہدایتوں کی کہانی شریعتوں کا نظام

غلط کہ ہاتھ میں نظم جہاں نہیں رکھتے

خبر کرو تو سہی عقل کے مریضوں کو

دوا وہ دیتے ہیں لیکن دکاں نہیں رکھتے

ہوئے جو ان کے تو یہ مرتبہ بھی ہاتھ آیا

زمیں پہ رہ کے بھی ہم آسماں نہیں رکھتے

رئیسؔ جبر کے قائل ہیں اختیار کے ساتھ

جہاز رکھتے ہیں اور بادباں نہیں رکھتے