nazar to aaya magar ja-ba-ja nahin aaya

nazar to aaya magar jā-ba-jā nahīñ aaya

zamīñ pe aadmī jaisā ḳhudā nahīñ aaya

bahāv laayā hai us ko kināre kī jānib

vo shaḳhs merī taraf tairtā nahīñ aaya

ik aur baar bichhaḌ kar na dekh leñ donoñ

ye zaḳhm ab bhī hameñ ek sā nahīñ aaya

hazār koshisheñ kar liiñ zamāne bhar ne magar

mirī nazar se use dekhnā nahīñ aaya

hamārā haq hī nahīñ hai ki ab duhā.ī deñ

ga.e huoñ ko agar roknā nahīñ aaya

barābarī kā tasavvur nahīñ hamārī taraf

hamāre jaisā koī dūsrā nahīñ aaya

nazar to aaya magar ja-ba-ja nahin aaya

zamin pe aadmi jaisa KHuda nahin aaya

bahaw laya hai us ko kinare ki jaanib

wo shaKHs meri taraf tairta nahin aaya

ek aur bar bichhaD kar na dekh len donon

ye zaKHm ab bhi hamein ek sa nahin aaya

hazar koshishen kar lin zamane bhar ne magar

meri nazar se use dekhna nahin aaya

hamara haq hi nahin hai ki ab duhai den

gae huon ko agar rokna nahin aaya

barabari ka tasawwur nahin hamari taraf

hamare jaisa koi dusra nahin aaya