nazar tum par paDe to muskurana bhul jate hain

nazar tum par paḌe to muskurānā bhuul jaate haiñ

ham apnī dāstān-e-ġham sunānā bhuul jaate haiñ

hamesha sochte haiñ ham use khonā nahīñ mushkil

ham apnī quvvat-e-dil āzmānā bhuul jaate haiñ

jahāñ saaqī kā lamhe bhar ko bhī dīdār ho jaa.e

junūn-e-tishnagī kā vo zamāna bhuul jaate haiñ

ye zanjīreñ ye pābandī nahīñ kuchh fā.eda detīñ

parinde qaid hoñ to chahchahānā bhuul jaate haiñ

ubharte chāñd kā manzar yā jalve hoñ bahāroñ ke

tire aage sab apnā qahr Dhānā bhuul jaate haiñ

ġham-e-barbādī-e-gulshan se gul bhī is qadar sahme

dukhī chehre pe ik muskāñ sajānā bhuul jaate haiñ

bulandī se girāne ke liye koshāñ haiñ jo 'māham'

falak terā azal se āshiyāna bhuul jaate haiñ

nazar tum par paDe to muskurana bhul jate hain

hum apni dastan-e-gham sunana bhul jate hain

hamesha sochte hain hum use khona nahin mushkil

hum apni quwwat-e-dil aazmana bhul jate hain

jahan saqi ka lamhe bhar ko bhi didar ho jae

junun-e-tishnagi ka wo zamana bhul jate hain

ye zanjiren ye pabandi nahin kuchh faeda detin

parinde qaid hon to chahchahana bhul jate hain

ubharte chand ka manzar ya jalwe hon bahaaron ke

tere aage sab apna qahr Dhana bhul jate hain

gham-e-barbaadi-e-gulshan se gul bhi is qadar sahme

dukhi chehre pe ek muskan sajaana bhul jate hain

bulandi se girane ke liye koshan hain jo 'maham'

falak tera azal se aashiyana bhul jate hain