نظر اداس نظارے خموش دل بیزار

نظر اداس نظارے خموش دل بیزار

جنون شوق یہ منزل ہے یا کہ رہ گزار

نہ جوش آتش گل ہے نہ خوف برق و شرر

نئی نئی سی اسیری نئی نئی سی بہار

ذرا سی بات بنی اک فسانہ آخر کار

میری نگاہ کی شوخی تری نظر کا خمار

غم حیات کے مارے ابھی تو سوئے ہیں

ابھی نہ دے اے نسیم سحر نوید بہار

غم جہان غم جستجو غم جاناں

کہاں کہاں نہ ملا اک شکستہ دل کو قرار

تری ہی یاد سہارا دئے رہی ورنہ

کہاں گزرتے ہیں تنہائیوں میں لیل و نہار

ترے بغیر اندھیروں میں کھو گئے جلوے

تری نظر سے فروزاں تھے آرزو کے دیار

نہ انتظار سحر اب ہے اور نہ وعدۂ شام

کہ رہ گیا ہے خلاؤں پہ زندگی کا مدار

نہ پوچھ کیسا یہ عالم ہوا ہے وحشت میں

گلوں کی آنچ سے بجھنے لگے ہیں دل کے شرار