nazar udas nazare KHamosh dil bezar

nazar udaas nazāre ḳhamosh dil bezār

junūn-e-shauq ye manzil hai yā ki rahguzār

na josh-e-ātish-e-gul hai na ḳhauf-e-barq-o-sharar

na.ī na.ī sī asīrī na.ī na.ī sī bahār

zarā sī baat banī ik fasāna āḳhir-e-kār

merī nigāh kī shoḳhī tirī nazar kā ḳhumār

ġham-e-hayāt ke maare abhī to so.e haiñ

abhī na de ai nasīm-e-sahar naved-e-bahār

ġham-e-jahān ġham-e-justujū ġham-e-jānāñ

kahāñ kahāñ na milā ik shikasta dil ko qarār

tirī hī yaad sahārā diye rahī varna

kahāñ guzarte haiñ tanhā.iyoñ meñ lail-o-nahār

tire baġhair añdheroñ meñ kho ga.e jalve

tirī nazar se farozāñ the aarzū ke dayār

na intizār-e-sahar ab hai aur na va.ada-e-shām

ki rah gayā hai ḳhalāoñ pe zindagī kā madār

na pūchh kaisā ye aalam huā hai vahshat meñ

guloñ kī aañch se bujhne lage haiñ dil ke sharār

nazar udas nazare KHamosh dil bezar

junun-e-shauq ye manzil hai ya ki rahguzar

na josh-e-atish-e-gul hai na KHauf-e-barq-o-sharar

nai nai si asiri nai nai si bahaar

zara si baat bani ek fasana aaKHir-e-kar

meri nigah ki shoKHi teri nazar ka KHumar

gham-e-hayat ke mare abhi to soe hain

abhi na de ai nasim-e-sahar nawed-e-bahaar

gham-e-jahan gham-e-justuju gham-e-jaanan

kahan kahan na mila ek shikasta dil ko qarar

teri hi yaad sahaara diye rahi warna

kahan guzarte hain tanhaiyon mein lail-o-nahaar

tere baghair andheron mein kho gae jalwe

teri nazar se farozan the aarzu ke dayar

na intizar-e-sahar ab hai aur na wada-e-sham

ki rah gaya hai KHalaon pe zindagi ka madar

na puchh kaisa ye aalam hua hai wahshat mein

gulon ki aanch se bujhne lage hain dil ke sharar