nazar unki nazar se meri Takrai to kya hoga

nazar un kī nazar se merī Takrā.ī to kyā hogā

qayāmat jis ko kahte haiñ vo yuuñ aa.ī to kyā hogā

na aa.e hosh meñ tere jo saudā.ī to kyā hogā

agar lī fasl-e-gul ne aa ke añgḌā.ī to kyā hogā

ghaTā uTh kar nasheman ko na raas aa.ī to kyā hogā

kahīñ in badliyoñ meñ barq lahrā.ī to kyā hogā

kabhī hai dasht-paimā.ī kabhī hai chāk-dāmānī

rahī yūñhī junūñ kī kār-farmā.ī to kyā hogā

hai lāzim haal meñ ai ham-safīro fikr-e-mustaqbil

abhī to fasl-e-gul hai kal ḳhizāñ aa.ī to kyā hogā

ba-zāhir be-ġharaz sajde ba-bātin ḳhvāhish-e-jannat

paḌī palle jo is saude meñ rusvā.ī to kyā hogā

tumhāre va.ada-e-fardā pe maiñ huuñ mutma.in lekin

kahīñ phir lan-tarānī kī sadā aa.ī to kyā hogā

thakā haarā musāfir dūr-e-manzil aur din thoḌā

agar ġhurbat meñ hogī shām-e-tanhā.ī to kyā hogā

sunā to duuñ unheñ rūdād-e-ġham apnī 'riyāzī' maiñ

ḳhudā-nā-ḳhvāsta aañkh un kī bhar aa.ī to kyā hogā

nazar un ki nazar se meri Takrai to kya hoga

qayamat jis ko kahte hain wo yun aai to kya hoga

na aae hosh mein tere jo saudai to kya hoga

agar li fasl-e-gul ne aa ke angDai to kya hoga

ghaTa uTh kar nasheman ko na ras aai to kya hoga

kahin in badliyon mein barq lahrai to kya hoga

kabhi hai dasht-paimai kabhi hai chaak-damani

rahi yunhi junun ki kar-farmai to kya hoga

hai lazim haal mein ai ham-safiro fikr-e-mustaqbil

abhi to fasl-e-gul hai kal KHizan aai to kya hoga

ba-zahir be-gharaz sajde ba-baatin KHwahish-e-jannat

paDi palle jo is saude mein ruswai to kya hoga

tumhaare wada-e-farda pe main hun mutmain lekin

kahin phir lan-tarani ki sada aai to kya hoga

thaka haara musafir dur-e-manzil aur din thoDa

agar ghurbat mein hogi sham-e-tanhai to kya hoga

suna to dun unhen rudad-e-gham apni 'riyazi' main

KHuda-na-KHwasta aankh un ki bhar aai to kya hoga