nazar uThti hai to hangam-e-mahshar yaad aata hai

nazar uThtī hai to hangām-e-mahshar yaad aatā hai

fasīloñ par abābīloñ kā lashkar yaad aatā hai

guzārī zindagī jis ne khajūroñ kī chatā.ī par

vo bosīda rasūlullah kā bistar yaad aatā hai

jo saf-ārā rahe barsoñ arab ke kohsāroñ par

un as.hāb-e-safā kā mujh ko lashkar yaad aatā hai

nasab sarkār ne jis ko kiyā ḳhud apne hāthoñ se

vaqār-e-azmat-e-ka.aba vo patthar yaad aatā hai

vo jaltī dhuup sahrā vo piyāsoñ kī ḳhunuk-tābī

taḌap jaatā huuñ jab karbal kā manzar yaad aatā hai

zabīhullāh ke hulqūm par jo kund ho jaa.e

ḳhalīlullāh kā mujh ko vo ḳhanjar yaad aatā hai

zamāne ko diyā jis ne shu.ūr-e-zindagī yaaro

mujhe rāh-e-vafā meñ ab vo rahbar yaad aatā hai

bhulā dī haiñ 'zafar' aslāf kī qadreñ sabhī ham ne

isī baa.is to ab maidān-e-mahshar yaad aatā hai

nazar uThti hai to hangam-e-mahshar yaad aata hai

fasilon par ababilon ka lashkar yaad aata hai

guzari zindagi jis ne khajuron ki chatai par

wo bosida rasulullah ka bistar yaad aata hai

jo saf-ara rahe barson arab ke kohsaron par

un ashab-e-safa ka mujh ko lashkar yaad aata hai

nasab sarkar ne jis ko kiya KHud apne hathon se

waqar-e-azmat-e-kaba wo patthar yaad aata hai

wo jalti dhup sahra wo piyason ki KHunuk-tabi

taDap jata hun jab karbal ka manzar yaad aata hai

zabihullah ke hulqum par jo kund ho jae

KHalilullah ka mujh ko wo KHanjar yaad aata hai

zamane ko diya jis ne shuur-e-zindagi yaro

mujhe rah-e-wafa mein ab wo rahbar yaad aata hai

bhula di hain 'zafar' aslaf ki qadren sabhi hum ne

isi bais to ab maidan-e-mahshar yaad aata hai