nazar wahi hai jo ruKHsar ke chaman mein rahe

nazar vahī hai jo ruḳhsār ke chaman meñ rahe

jabīn-o-kākul-e-barham kī har shikan meñ rahe

tujhe bhī yaad hai kuchh ai jamāl-e-mahbūbī

nigāh ban ke bhī ham tere pairahan meñ rahe

niyāz-e-ishq ko itnā bhī rabt kyā kam hai

ki apnā zikr-e-mohabbat us anjuman meñ rahe

ye qaid-e-ġham kā zamāna bhī kaaT hī leñge

hamārā husn-e-nazar tere pairahan meñ rahe

hamāre paas kahāñ aisī zindagī sayyād

ki zer-e-dām rahe halqa-e-rasan meñ rahe

ghulī ghulī lab-o-āriz meñ kaifiyāt-e-bahār

sharāb ban ke lahū bhī tire badan meñ rahe

tabāhiyoñ ko bhī ik raah mil ga.ī 'saifī'

vo apne zo'm meñ ham apne bāñkpan meñ rahe

nazar wahi hai jo ruKHsar ke chaman mein rahe

jabin-o-kakul-e-barham ki har shikan mein rahe

tujhe bhi yaad hai kuchh ai jamal-e-mahbubi

nigah ban ke bhi hum tere pairahan mein rahe

niyaz-e-ishq ko itna bhi rabt kya kam hai

ki apna zikr-e-mohabbat us anjuman mein rahe

ye qaid-e-gham ka zamana bhi kaT hi lenge

hamara husn-e-nazar tere pairahan mein rahe

hamare pas kahan aisi zindagi sayyaad

ki zer-e-dam rahe halqa-e-rasan mein rahe

ghuli ghuli lab-o-ariz mein kaifiyat-e-bahaar

sharab ban ke lahu bhi tere badan mein rahe

tabahiyon ko bhi ek rah mil gai 'saifi'

wo apne zo'm mein hum apne bankpan mein rahe