نظر وہی ہے جو رخسار کے چمن میں رہے

نظر وہی ہے جو رخسار کے چمن میں رہے

جبین و کاکل برہم کی ہر شکن میں رہے

تجھے بھی یاد ہے کچھ اے جمال محبوبی

نگاہ بن کے بھی ہم تیرے پیرہن میں رہے

نیاز عشق کو اتنا بھی ربط کیا کم ہے

کہ اپنا ذکر محبت اس انجمن میں رہے

یہ قید غم کا زمانہ بھی کاٹ ہی لیں گے

ہمارا حسن نظر تیرے پیرہن میں رہے

ہمارے پاس کہاں ایسی زندگی صیاد

کہ زیر دام رہے حلقۂ رسن میں رہے

گھلی گھلی لب و عارض میں کیفیات بہار

شراب بن کے لہو بھی ترے بدن میں رہے

تباہیوں کو بھی اک راہ مل گئی سیفیؔ

وہ اپنے زعم میں ہم اپنے بانکپن میں رہے