nazm bhi git bhi naghma bhi ghazal bhi tu hai

nazm bhī giit bhī naġhma bhī ġhazal bhī tū hai

merī sochoñ kā hasīñ tāj-mahal bhī tū hai

merī bedārī-e-ehsās kā zāmin bhī tū

mere pākīza tasavvur kā badal bhī tū hai

tujh se mansūb haiñ ḳhushiyāñ bhī alam bhī ya.anī

merī kamzorī bhī tū hai mirā bal bhī tū hai

tū hī uljhan kā sabab hai mire haq meñ lekin

merī pechīdgī-e-zīst kā hal bhī tū hai

merī tahzīb kā ā.īna-e-be-dāġh bhī tū

merā kirdār mirā husn-e-amal bhī tū hai

tere hī dam se hai raushan mirī duniyā jānāñ

merā sūraj bhī mirā chāñd kañval bhī tū hai

sirf rāqim ke sivā kuchh bhī nahīñ terā ‘ḳhatīb’

tū ġhazal bhī sabab-e-husn-e-ġhazal bhī tū hai

nazm bhi git bhi naghma bhi ghazal bhi tu hai

meri sochon ka hasin taj-mahal bhi tu hai

meri bedari-e-ehsas ka zamin bhi tu

mere pakiza tasawwur ka badal bhi tu hai

tujh se mansub hain KHushiyan bhi alam bhi yani

meri kamzori bhi tu hai mera bal bhi tu hai

tu hi uljhan ka sabab hai mere haq mein lekin

meri pechidgi-e-zist ka hal bhi tu hai

meri tahzib ka aaina-e-be-dagh bhi tu

mera kirdar mera husn-e-amal bhi tu hai

tere hi dam se hai raushan meri duniya jaanan

mera suraj bhi mera chand kanwal bhi tu hai

sirf raqim ke siwa kuchh bhi nahin tera ‘KHatib’

tu ghazal bhi sabab-e-husn-e-ghazal bhi tu hai