نظم حاضر کا بدلتا ہوا انداز ہیں ہم

نظم حاضر کا بدلتا ہوا انداز ہیں ہم

غور سے سن کہ نئے دور کی آواز ہیں ہم

جانے کب پہنچے گی انجام کو تہذیب بشر

بعد صدیوں کے بھی آغاز ہی آغاز ہیں ہم

بجتی رہتی ہے نئے گیت کی سرگم دل میں

بے نوائی میں بھی بجتا ہوا اک ساز ہیں ہم

ہدیۂ گوش سماعت ہی کوئی پیش کرے

کرب تخلیق میں ڈوبی ہوئی آواز ہیں ہم

دہر کے دل میں اترتا ہے جو نشتر کی طرح

لب فطرت کا وہی نغمۂ اعجاز ہیں ہم

رات دن کھلتے ہیں اسرار دو عالم ہم سے

اپنے عالم میں مگر آج بھی اک رازؔ ہیں ہم