نظم میں اترے گا دل کا درد سارا آج پھر

نظم میں اترے گا دل کا درد سارا آج پھر

دھل کے نکھرے گا نیا اک استعارا آج پھر

جن کی تحریروں نے قسمت کی لکیریں کاٹ دیں

کر رہا ہوں ان خطوں سے استخارا آج پھر

عشق کے سود و زیاں میں ذہن و دل الجھے رہے

اور دل نے کر لیا اپنا خسارا آج پھر

آج پھر میں آسماں کو رات بھر تکتا رہا

رات بھر ٹوٹا نہیں کوئی ستارا آج پھر

پھر کھلی پلکوں کے آگے خواب منڈراتے رہے

کر گئی ہے نیند آنکھوں سے کنارا آج پھر

ایک تنہا دل اور اس پر روز روز ایسے عذاب

کل کا دن بھی درد فرقت میں گزارا آج پھر