nazren milin na apni kabhi guftugu hui

nazreñ milīñ na apnī kabhī guftugū huī

kahne ko roz duniyā mire rū-ba-rū huī

yuuñ hī nahīñ banā hai tasavvur meñ terā aks

barsoñ tujhe tarāshā hai tab jā ke tū huī

pahle pahal to chalte rahe be-niyāz ham

thakne lage to manziloñ kī justujū huī

ik din daraḳht-e-dil ko mere chhū gayā koī

barsoñ ke ba.ad shāḳh-e-tamannā numū huī

pahlī dafa hue haiñ in āñkhoñ se ham-kalām

itne adab se pahle kahāñ guftugū huī

sochā to ham ne tujh ko ka.ī baar thā magar

ik umr ba.ad ham ko tirī aarzū huī

nazren milin na apni kabhi guftugu hui

kahne ko roz duniya mere ru-ba-ru hui

yun hi nahin bana hai tasawwur mein tera aks

barson tujhe tarasha hai tab ja ke tu hui

pahle pahal to chalte rahe be-niyaz hum

thakne lage to manzilon ki justuju hui

ek din daraKHt-e-dil ko mere chhu gaya koi

barson ke baad shaKH-e-tamanna numu hui

pahli dafa hue hain in aankhon se ham-kalam

itne adab se pahle kahan guftugu hui

socha to hum ne tujh ko kai bar tha magar

ek umr baad hum ko teri aarzu hui