nazron ka mohabbat bhara paigham bahut hai

nazroñ kā mohabbat bharā paiġhām bahut hai

majbūr-e-vafā ke liye in.aam bahut hai

kuchh bāda-o-sāġhar kī zarūrat nahīñ mujh ko

āñkhoñ se chhalaktī mai-e-gulfām bahut hai

kyā haal ho kyā jaane shab-e-ġham kī sahar kā

betābī-e-dil aaj sar-e-shām bahut hai

tauhīn-e-mohabbat haiñ mohabbat meñ ye shikve

lagtā hai abhī husn-e-talab-ḳhām bahut hai

be-vaj.h mujhe bevafā kahte to ho lekin

tum par bhī isī qism kā ilzām bahut hai

nādān rah-e-ishq ko āsān na samjheñ

is raah meñ kaThinā.ī ba-har-gām bahut hai

is shauq adāoñ ko koī kuchh nahīñ kahtā

charchā mirī ulfat kā sar-e-ām bahut hai

kuchh aa hī gayā dost kā dushman kā salīqa

ehsān tirā gardish-e-ayyām bahut hai

afkār-e-zamāna kabhī afkār-e-mohabbat

hai zindagī thoḌī sī magar kaam bahut hai

ai 'mauj' sukūñ-baḳhsh haiñ amvāj-e-mohabbat

āġhosh meñ tūfāñ ke bhī ārām bahut hai

nazron ka mohabbat bhara paigham bahut hai

majbur-e-wafa ke liye inam bahut hai

kuchh baada-o-saghar ki zarurat nahin mujh ko

aankhon se chhalakti mai-e-gulfam bahut hai

kya haal ho kya jaane shab-e-gham ki sahar ka

betabi-e-dil aaj sar-e-sham bahut hai

tauhin-e-mohabbat hain mohabbat mein ye shikwe

lagta hai abhi husn-e-talab-KHam bahut hai

be-wajh mujhe bewafa kahte to ho lekin

tum par bhi isi qism ka ilzam bahut hai

nadan rah-e-ishq ko aasan na samjhen

is rah mein kaThinai ba-har-gam bahut hai

is shauq adaon ko koi kuchh nahin kahta

charcha meri ulfat ka sar-e-am bahut hai

kuchh aa hi gaya dost ka dushman ka saliqa

ehsan tera gardish-e-ayyam bahut hai

afkar-e-zamana kabhi afkar-e-mohabbat

hai zindagi thoDi si magar kaam bahut hai

ai 'mauj' sukun-baKHsh hain amwaj-e-mohabbat

aaghosh mein tufan ke bhi aaram bahut hai