nazron se basirat ki nihan kuchh bhi nahin hai

nazroñ se basīrat kī nihāñ kuchh bhī nahīñ hai

sab kuchh hai jahāñ aur jahāñ kuchh bhī nahīñ hai

ham miT ga.e is fitrat-e-āshufta kī ḳhātir

hālāñki vo ġhārat-gar-e-jāñ kuchh bhī nahīñ hai

dil kī jo na kahiye to zabāñ kāshif-e-asrār

aur dil kī jo kahiye to zabāñ kuchh bhī nahīñ hai

dil vāloñ ko dil vāloñ se hai harf-o-hikāyat

zāhir meñ mohabbat kā nishāñ kuchh bhī nahīñ hai

rañgīn-o-nazar soz-o-manāzir se guzar kar

pahuñchā huuñ vahāñ maiñ ki jahāñ kuchh bhī nahīñ hai

ye ishq kī zāhir ho to hil jaa.eñ do-ālam

juz chand ishārāt nihāñ kuchh bhī nahīñ hai

mujh ḳhūgar-e-begānī-e-dost ko 'ālī'

be-gāñgī-e-ahl-e-jahāñ kuchh bhī nahīñ hai

nazron se basirat ki nihan kuchh bhi nahin hai

sab kuchh hai jahan aur jahan kuchh bhi nahin hai

hum miT gae is fitrat-e-ashufta ki KHatir

haalanki wo ghaarat-gar-e-jaan kuchh bhi nahin hai

dil ki jo na kahiye to zaban kashif-e-asrar

aur dil ki jo kahiye to zaban kuchh bhi nahin hai

dil walon ko dil walon se hai harf-o-hikayat

zahir mein mohabbat ka nishan kuchh bhi nahin hai

rangin-o-nazar soz-o-manazir se guzar kar

pahuncha hun wahan main ki jahan kuchh bhi nahin hai

ye ishq ki zahir ho to hil jaen do-alam

juz chand ishaaraat nihan kuchh bhi nahin hai

mujh KHugar-e-begani-e-dost ko 'ali'

be-gangi-e-ahl-e-jahan kuchh bhi nahin hai