نظروں سے گلوں کی نونہالو

نظروں سے گلوں کی نونہالو

شبنم کی طرح گرا سنبھالو

مانو رہ سرکشی نکالو

پگڑی مہ و مہر کی اچھالو

صیاد خفا ہے بلبل و کبک

خاموش رہو نہ بولو چالو

اصنام میں شان حق عیاں ہے

آنکھیں ہیں تو ان کو دیکھو بھالو

ٹھہرو کوئی دم کے مہمان ہیں

چلتے تو ہیں ہم بھی چلنے والو

مشتاق لقا ہے اک خدائی

اب وعدہ حشر پر نہ ٹالو

جھوٹے وہ تم اے گلو ہو برسوں

بے دودھ جو طفل غنچہ پا لو

چھلنی یوں ہی دل ہے نیش غم سے

مژگاں کی نہ برچھیاں سنبھالو

ہولی نئے قمقموں سے کھیلو

پر خون دل عاشقاں اچھالو

مارا ہی جو شادؔ کو حسینو

خاطر سے غبار تو نکالو