nazzara-e-nigah ka unwan badal gaya

nazzāra-e-nigāh kā unvāñ badal gayā

vo kyā ga.e ki rañg-e-gulistāñ badal gayā

josh-e-junūn-e-ishq kā sāmāñ badal gayā

dāmāñ pe haath thā ki garebāñ badal gayā

mahsūs kar rahā huuñ har insāñ ko ajnabī

vo kyā badal ga.e ki har insāñ badal gayā

guzrā har inqalāb se daur-e-junūñ magar

dāmāñ badal gayā ki garebāñ badal gayā

vahshat-navāz ab vo nazāre nahīñ rahe

nazreñ badal ga.iiñ ki bayābāñ badal gayā

is chashm-e-iltifāt kā aalam na pūchhiye

aksar nizām-e-gardish-e-daurāñ badal gayā

kyā jaane 'sā.ib' aaj ye daurān-e-arz-e-shauq

kyuuñ daf.atan vo chehra-e-ḳhandāñ badal gayā

nazzara-e-nigah ka unwan badal gaya

wo kya gae ki rang-e-gulistan badal gaya

josh-e-junun-e-ishq ka saman badal gaya

daman pe hath tha ki gareban badal gaya

mahsus kar raha hun har insan ko ajnabi

wo kya badal gae ki har insan badal gaya

guzra har inqalab se daur-e-junun magar

daman badal gaya ki gareban badal gaya

wahshat-nawaz ab wo nazare nahin rahe

nazren badal gain ki bayaban badal gaya

is chashm-e-iltifat ka aalam na puchhiye

aksar nizam-e-gardish-e-dauran badal gaya

kya jaane 'saib' aaj ye dauran-e-arz-e-shauq

kyun dafatan wo chehra-e-KHandan badal gaya