nek-o-bad ki jise KHabar hi nahin

nek-o-bad kī jise ḳhabar hī nahīñ

shar hai kam-baḳht vo bashar hī nahīñ

vo haiñ kis haal meñ ḳhabar hī nahīñ

sar bhī nīchā hai ik nazar hī nahīñ

haath ḳhālī hai māl-o-zar hī nahīñ

kyā uḌeñ jabki bāl-o-par hī nahīñ

mai kī bābat ḳhayāl kar vaa.iz

is meñ naf.e bhī haiñ zarar hī nahīñ

sharm se tere rū-e-raushan ke

shams bhī zard hai qamar hī nahīñ

jis ke baa.is hai zindagī be-lutf

lutf ye hai use ḳhabar hī nahīñ

raah har dil ko hotī hai dil se

mere dil kī unheñ ḳhabar hī nahīñ

yaar to qatl-e-ām kar Daale

teġh bāñdhe kahāñ kamar hī nahīñ

zabt kī nisbat aap kā hai ḳhayāl

maiñ huuñ āshiq mire jigar hī nahīñ

mere siine ko chiir kar dekho

dil bhī rotā hai chashm-e-tar hī nahīñ

āsmāñ laakh baar dushman ho

kyā ho barbād mere ghar hī nahīñ

kaun kahtā hai mujh ko saudā.ī

ek muddat se mere sar hī nahīñ

ham qayāmat se bhī hue be-fikr

shab-e-hijrāñ kī jab sahar hī nahīñ

paañv phailā.e mast hote haiñ

fuqarā kyūñki māl-o-zar hī nahīñ

vo to mujh ko jalā.e jā.eñge

ba.ad murdan bhī umr bhar hī nahīñ

ba.ad murdan hai hashr kā khaTkā

merī jaañ fikr se mafar hī nahīñ

murġh be-vaj.h chīḳhe jaatā hai

ye na bole to jānvar hī nahīñ

zulm par ab hai āsmāñ nādim

sar bhī nīchā hai ik nazar hī nahīñ

tauba tauba hazār-hā sharteñ

kyā batā.ūñ agar magar hī nahīñ

phirte ho saikḌoñ nadīdoñ meñ

tum ko ḳhauf-e-nazar guzar hī nahīñ

aadmī aadmī hai izzat se

aab jis meñ na ho guhar hī nahīñ

kam hai ye zād-e-rāh ai 'parvīñ'

tum ko andāza-e-safar hī nahīñ

nek-o-bad ki jise KHabar hi nahin

shar hai kam-baKHt wo bashar hi nahin

wo hain kis haal mein KHabar hi nahin

sar bhi nicha hai ek nazar hi nahin

hath KHali hai mal-o-zar hi nahin

kya uDen jabki baal-o-par hi nahin

mai ki babat KHayal kar waiz

is mein nafe bhi hain zarar hi nahin

sharm se tere ru-e-raushan ke

shams bhi zard hai qamar hi nahin

jis ke bais hai zindagi be-lutf

lutf ye hai use KHabar hi nahin

rah har dil ko hoti hai dil se

mere dil ki unhen KHabar hi nahin

yar to qatl-e-am kar Dale

tegh bandhe kahan kamar hi nahin

zabt ki nisbat aap ka hai KHayal

main hun aashiq mere jigar hi nahin

mere sine ko chir kar dekho

dil bhi rota hai chashm-e-tar hi nahin

aasman lakh bar dushman ho

kya ho barbaad mere ghar hi nahin

kaun kahta hai mujh ko saudai

ek muddat se mere sar hi nahin

hum qayamat se bhi hue be-fikr

shab-e-hijran ki jab sahar hi nahin

panw phailae mast hote hain

fuqara kyunki mal-o-zar hi nahin

wo to mujh ko jalae jaenge

baad murdan bhi umr bhar hi nahin

baad murdan hai hashr ka khaTka

meri jaan fikr se mafar hi nahin

murgh be-wajh chiKHe jata hai

ye na bole to jaanwar hi nahin

zulm par ab hai aasman nadim

sar bhi nicha hai ek nazar hi nahin

tauba tauba hazar-ha sharten

kya bataun agar magar hi nahin

phirte ho saikDon nadidon mein

tum ko KHauf-e-nazar guzar hi nahin

aadmi aadmi hai izzat se

aab jis mein na ho guhar hi nahin

kam hai ye zad-e-rah ai 'parwin'

tum ko andaza-e-safar hi nahin