نیکی ہے اک جنوں مجھے اب تک یقیں نہیں

نیکی ہے اک جنوں مجھے اب تک یقیں نہیں

ہے صدق سرنگوں مجھے اب تک یقیں نہیں

کہتے ہو تم یہ دور ہے مکر و فریب کا

اے دوست کیا کہوں مجھے اب تک یقیں نہیں

خنجر بکف ہزار ہیں باطل کی قوتیں

ایمان کا ہو خوں مجھے اب تک یقیں نہیں

ہنگامہ خیزیوں پہ لگے مہر شادباش

بدنام ہو سکوں مجھے اب تک یقیں نہیں

کہتے ہیں اب رہے گا نہ باقی کوئی شریف

بدلے گا رنگ یوں مجھے اب تک یقیں نہیں

مستقبل قریب میں گر جائیں گے تمام

اخلاق کے ستوں مجھے اب تک یقیں نہیں

رسم وفا و مہر میں پاتا ہوں دل کشی

باطل ہے یہ فسوں مجھے اب تک یقیں نہیں