نیزے کی بلندی پہ ہے سر خم تو نہیں ہے

نیزے کی بلندی پہ ہے سر خم تو نہیں ہے

یہ شان یہ توقیر بھی کچھ کم تو نہیں ہے

شب بھر کوئی رویا ہے سر فصل بہاراں

یہ برگ گل و لالہ پہ شبنم تو نہیں ہے

صد شکر کہ کھل اٹھے مرے زخم جگر اور

یہ طنزیہ پرسش تری مرہم تو نہیں ہے

اب بھی وہی دنیا ہے مناظر بھی وہی ہیں

دل کا مگر اب پہلے سا عالم تو نہیں ہے

یعنی کہ ابھی خم نہیں سر پیش سلاسل

نغمات کی لے اونچی ہے مدھم تو نہیں ہے

برسوں اسے سینچا ہے لہو دے کے کسی نے

گلشن کی یہ مٹی بھی یوں ہی نم تو نہیں ہے

گر زاد سفر عزم جواں ہو تو شریفؔ آج

ہے زیست جو دو دن کی تو کچھ کم تو نہیں ہے