neze pe sar chaDhega sayyad ko sab pata tha

neze pe sar chaḌhegā sayyad ko sab patā thā

lekin vo sū-e-maqtal be-ḳhauf chal rahā thā

beTe bhatīje bhaa.ī vaare nahīñ jhukā vo

bātil ko haq na maanā itnā sā mudda.ā thā

mātam-kunāñ thā us pal insāniyat pe sahrā

bāñhoñ meñ jab vo lāsh-e-asġhar liye khaḌā thā

yāqūb kī tarah se royā na thā idhar vo

nabiyoñ se baḌh ke mere murshid kā hausla thā

tārīḳh paḌh ke dekheñ miltā nahīñ koī bhī

karb-o-balā meñ jaise ġhāzī mirā laḌā thā

islām zinda hai to zinda husain bhī haiñ

karbal faqat yazīdī naḳhvat kā ḳhātma thā

martā nahīñ 'zafar' jo haq sach pe sar kaTā de

sochoñ ko jis ne badlā aisā vo sāneha thā

neze pe sar chaDhega sayyad ko sab pata tha

lekin wo su-e-maqtal be-KHauf chal raha tha

beTe bhatije bhai ware nahin jhuka wo

baatil ko haq na mana itna sa muddaa tha

matam-kunan tha us pal insaniyat pe sahra

banhon mein jab wo lash-e-asghar liye khaDa tha

yaqub ki tarah se roya na tha idhar wo

nabiyon se baDh ke mere murshid ka hausla tha

tariKH paDh ke dekhen milta nahin koi bhi

karb-o-bala mein jaise ghazi mera laDa tha

islam zinda hai to zinda husain bhi hain

karbal faqat yazidi naKHwat ka KHatma tha

marta nahin 'zafar' jo haq sach pe sar kaTa de

sochon ko jis ne badla aisa wo saneha tha