nibhana ho wada to aisa karen

nibhānā ho va.ada to aisā kareñ

ki va.ade se pahle irāda kareñ

har ik baar apnī hadeñ aañk kar

har ik baat had se ziyāda kareñ

talātum kī dhun jin kā sañgīt hai

vo tūfāñ ke hī giit gaayā kareñ

adhūrā rahegā ye rishta agar

ham ik dūsre ko na puurā kareñ

ye paanī kā hai farz har haal meñ

so aañsū bhī nikle to sabza kareñ

marāsim ke dhāgoñ kī tāsīr hai

ki suljhā.ūñ jitne ye uljhā kareñ

raheñ dil meñ kuchh barahna hasrateñ

na āñkhoñ kī khiḌkī se jhāñkā kareñ

nibhana ho wada to aisa karen

ki wade se pahle irada karen

har ek bar apni haden aank kar

har ek baat had se ziyaada karen

talatum ki dhun jin ka sangit hai

wo tufan ke hi git gaya karen

adhura rahega ye rishta agar

hum ek dusre ko na pura karen

ye pani ka hai farz har haal mein

so aansu bhi nikle to sabza karen

marasim ke dhagon ki tasir hai

ki suljhaun jitne ye uljha karen

rahen dil mein kuchh barahna hasraten

na aankhon ki khiDki se jhanka karen