nigah aaina hai aks-e-mustaar hun main

nigāh ā.īna hai aks-e-musta.ār huuñ maiñ

hayāt qarz hai mujh par to zer-e-bār huuñ maiñ

pighal na jaa.e anā shiddat-e-tamāzat se

girāñ hai tab-e-ḳharīdār kam-ayār huuñ maiñ

savād-e-shab meñ ik āvāz par huuñ garm-e-safar

asīr-e-zulf na āvāra-e-bahār huuñ maiñ

hinā.ī hāthoñ se chehra chhupā rahā hai vo

shikast-e-ahd pe bhī tahniyat-guzār huuñ maiñ

jo pau phaTe to naved-e-sahar mile 'ishrat'

hazār rātoñ se sar-tā-pā intizār huuñ maiñ

nigah aaina hai aks-e-mustaar hun main

hayat qarz hai mujh par to zer-e-bar hun main

pighal na jae ana shiddat-e-tamazat se

giran hai tab-e-KHaridar kam-ayar hun main

sawad-e-shab mein ek aawaz par hun garm-e-safar

asir-e-zulf na aawara-e-bahaar hun main

hinai hathon se chehra chhupa raha hai wo

shikast-e-ahd pe bhi tahniyat-guzar hun main

jo pau phaTe to nawed-e-sahar mile 'ishrat'

hazar raaton se sar-ta-pa intizar hun main