nigah-e-husn ne jadu jagae hain kya kya

nigāh-e-husn ne jaadū jagā.e haiñ kyā kyā

fareb ahl-e-mohabbat ne khaa.e haiñ kyā kyā

kisī ne va.ada-e-fardā kā aasrā de kar

hasīn ḳhvāb-e-tamannā dikhā.e haiñ kyā kyā

zamāna jin ko samajhtā hai dāġh-e-mahrūmī

mirī hayāt meñ vo rang laa.e haiñ kyā kyā

na ho sakī kabhī takmīl-e-ārzū phir bhī

bisāt-e-zehn pe ḳhāke banā.e haiñ kyā kyā

matā-e-ġham kise ma.alūm hai ki ham 'ahmad'

na jaane pahlū-e-dil meñ chhupā.e haiñ kyā kyā

nigah-e-husn ne jadu jagae hain kya kya

fareb ahl-e-mohabbat ne khae hain kya kya

kisi ne wada-e-farda ka aasra de kar

hasin KHwab-e-tamanna dikhae hain kya kya

zamana jin ko samajhta hai dagh-e-mahrumi

meri hayat mein wo rang lae hain kya kya

na ho saki kabhi takmil-e-arzu phir bhi

bisat-e-zehn pe KHake banae hain kya kya

mata-e-gham kise malum hai ki hum 'ahmad'

na jaane pahlu-e-dil mein chhupae hain kya kya