nigah-e-ishq mein tabindagi nahin milti

nigāh-e-ishq meñ tābindagī nahīñ miltī

charāġh-e-husn se ab raushnī nahīñ miltī

sar-e-niyāz jhukā.egā kyā koī ḳhuddār

nigāh-e-nāz se jab daad hī nahīñ miltī

sharīk-e-dard-e-mohabbat koī nahīñ hotā

kisī se dād-e-mohabbat kabhī nahīñ miltī

nigāh-e-sāqī-e-rā.anā kā ye bhī ehsāñ hai

ba-qadr-e-zauq mai-e-āgahī nahīñ miltī

ye mai-kada hai yahāñ qaid-e-zarf-e-zauq bhī hai

ye kyā kahā ki mai-e-zindagī nahīñ miltī

ziyā-e-husn hai mahdūd bazm-e-imkāñ tak

phir is ke ba.ad kahīñ raushnī nahīñ miltī

bajā hai aap kā irshād māntā huuñ maiñ

kalām-e-'rāz' meñ ab zindagī nahīñ miltī

nigah-e-ishq mein tabindagi nahin milti

charagh-e-husn se ab raushni nahin milti

sar-e-niyaz jhukaega kya koi KHuddar

nigah-e-naz se jab dad hi nahin milti

sharik-e-dard-e-mohabbat koi nahin hota

kisi se dad-e-mohabbat kabhi nahin milti

nigah-e-saqi-e-raana ka ye bhi ehsan hai

ba-qadr-e-zauq mai-e-agahi nahin milti

ye mai-kada hai yahan qaid-e-zarf-e-zauq bhi hai

ye kya kaha ki mai-e-zindagi nahin milti

ziya-e-husn hai mahdud bazm-e-imkan tak

phir is ke baad kahin raushni nahin milti

baja hai aap ka irshad manta hun main

kalam-e-'raaz' mein ab zindagi nahin milti