nigah-e-mast mein kya rang-e-walihana tha

nigāh-e-mast meñ kyā rañg-e-vālihāna thā

surūr-o-kaif meñ Duubā huā zamāna thā

kisī kī uThtī javānī kā jab zamāna thā

mirī nigāh kā har fe.al shā.irāna thā

sitam-nasīb kī allāh re soḳhta baḳhtī

hai bijliyoñ kā nasheman jo āshiyāna thā

azal se qaid-e-anāsir atā huī mujh ko

mire nasīb meñ zindāñ kā āb-o-dāna thā

vufūr-e-dard se jab hichkiyāñ sī aane lagīñ

har ek zaḳhm ke lab par mirā fasāna thā

shurū-e-ishq meñ kyā merī shā.irī thī na pūchh

falak pe murġh-e-taḳhayyul kā āshiyāna thā

vatan meñ hazrat-e-'altāf' zindagī apnī

bahār ḳhuld-e-mohabbat kā ik fasāna thā

nigah-e-mast mein kya rang-e-walihana tha

surur-o-kaif mein Duba hua zamana tha

kisi ki uThti jawani ka jab zamana tha

meri nigah ka har feal shairana tha

sitam-nasib ki allah re soKHta baKHti

hai bijliyon ka nasheman jo aashiyana tha

azal se qaid-e-anasir ata hui mujh ko

mere nasib mein zindan ka aab-o-dana tha

wufur-e-dard se jab hichkiyan si aane lagin

har ek zaKHm ke lab par mera fasana tha

shuru-e-ishq mein kya meri shairi thi na puchh

falak pe murgh-e-taKHayyul ka aashiyana tha

watan mein hazrat-e-'altaf' zindagi apni

bahaar KHuld-e-mohabbat ka ek fasana tha