nigah-e-qahr-parwar ko bhi tamhid-e-KHushi samjhe

nigāh-e-qahr-parvar ko bhī tamhīd-e-ḳhushī samjhe

samajhnā hai to koī ham se rāz-e-zindagī samjhe

vafāoñ kā natīja ham to jo kuchh hai samajhte haiñ

magar ai kaash anjām-e-jafā vo bhī kabhī samjhe

use dair-o-haram meñ jāzbiyyat kyā nazar aa.e

jo terī diid ko asl-e-mazāq-e-bandagī samjhe

hameñ to ḳhair jo kuchh aap ne chāhā vo samjhāyā

magar ye to zarā samjhā.iye kuchh aap bhī samjhe

bhalā 'naḳhshab' tire is be-niyāzāna ravayye ko

kamāl-e-qurb jaane yā mohabbat kī kamī samjhe

nigah-e-qahr-parwar ko bhi tamhid-e-KHushi samjhe

samajhna hai to koi hum se raaz-e-zindagi samjhe

wafaon ka natija hum to jo kuchh hai samajhte hain

magar ai kash anjam-e-jafa wo bhi kabhi samjhe

use dair-o-haram mein jazbiyyat kya nazar aae

jo teri did ko asl-e-mazaq-e-bandagi samjhe

hamein to KHair jo kuchh aap ne chaha wo samjhaya

magar ye to zara samjhaiye kuchh aap bhi samjhe

bhala 'naKHshab' tere is be-niyazana rawayye ko

kamal-e-qurb jaane ya mohabbat ki kami samjhe