nigah-e-shauq se kab tak muqabla karte

nigāh-e-shauq se kab tak muqābla karte

vo iltifāt na karte to aur kyā karte

ye rasm-e-tark-e-mohabbat bhī ham adā karte

tere baġhair magar zindagī ko kyā karte

ġhurūr-e-husn ko mānūs-e-iltijā karte

vo ham nahīñ ki jo ḳhud-dāriyāñ fanā karte

kisī kī yaad ne taḌpā diyā phir aa ke hameñ

huī thī der na kuchh dil se mashvarā karte

ye pūchho husn ko ilzām dene vāloñ se

jo vo sitam bhī na kartā to aap kyā karte

sitam-shi.ār azal se hai husn kī fitrat

jo maiñ vafā bhī na kartā to vo jafā karte

hameñ to apnī tabāhī kī daad bhī na milī

tirī navāzish-e-bejā kā kyā gilā karte

nigāh-e-nāz kī māsūmiyat are tauba

jo ham fareb na khāte to aur kyā karte

nigāh-e-lutf kī taskīñ kā shukriyā lekin

matā-e-dard ko kis dil se ham judā karte

nigah-e-shauq se kab tak muqabla karte

wo iltifat na karte to aur kya karte

ye rasm-e-tark-e-mohabbat bhi hum ada karte

tere baghair magar zindagi ko kya karte

ghurur-e-husn ko manus-e-iltija karte

wo hum nahin ki jo KHud-dariyan fana karte

kisi ki yaad ne taDpa diya phir aa ke hamein

hui thi der na kuchh dil se mashwara karte

ye puchho husn ko ilzam dene walon se

jo wo sitam bhi na karta to aap kya karte

sitam-shiar azal se hai husn ki fitrat

jo main wafa bhi na karta to wo jafa karte

hamein to apni tabahi ki dad bhi na mili

teri nawazish-e-beja ka kya gila karte

nigah-e-naz ki masumiyat are tauba

jo hum fareb na khate to aur kya karte

nigah-e-lutf ki taskin ka shukriya lekin

mata-e-dard ko kis dil se hum juda karte