nigah-e-yas se jo ashk ke gauhar nikalte hain

nigāh-e-yās se jo ashk ke gauhar nikalte haiñ

vo ḳhūn-e-ārzū se surḳh-rū ho kar nikalte haiñ

harīm-e-nāz se vo is tarah bāhar nikalte haiñ

ba-har parda ba-har jalva ba-har manzar nikalte haiñ

sikhā.e the jinhoñ ne ishq ko ādāb-e-jāñ-bāzī

vahī kāfir ishāre zindagī-parvar nikalte haiñ

rasā.ī gosha-e-dāmāñ tak un ke kis tarah hogī

tasavvur kī hadoñ meñ bhī jo sharmā kar nikalte haiñ

mujhe yārān-e-sāhil dāman-e-girdāb meñ DhūñDheñ

ġharīq-e-varta-e-ġham kab kināre par nikalte haiñ

jo āgāh-e-rumūz-e-zindagī haiñ bazm-e-hastī meñ

vo aksar aish meñ bhī dard ke ḳhūgar nikalte haiñ

charāġh-e-rahbarī hotā hai har ik naqsh-e-pā jin kā

vo sālik be-niyāz-e-jāda-o-rahbar nikalte haiñ

vahī har ek jalva meñ tajallī-rez rahte haiñ

vahī har ek manzar meñ pas-e-manzar nikalte haiñ

kisī kā naqsh-e-pā jab dāvat-e-taslīm detā hai

taḌap kar sajda-hā-e-ārzū bāhar nikalte haiñ

'anīs' ehsās-e-dard-o-fart-e-māyūsī ko kyā kahiye

ki ab aañsū bhī merī aañkh se kamtar nikalte haiñ

nigah-e-yas se jo ashk ke gauhar nikalte hain

wo KHun-e-arzu se surKH-ru ho kar nikalte hain

harim-e-naz se wo is tarah bahar nikalte hain

ba-har parda ba-har jalwa ba-har manzar nikalte hain

sikhae the jinhon ne ishq ko aadab-e-jaan-bazi

wahi kafir ishaare zindagi-parwar nikalte hain

rasai gosha-e-daman tak un ke kis tarah hogi

tasawwur ki hadon mein bhi jo sharma kar nikalte hain

mujhe yaran-e-sahil daman-e-girdab mein DhunDhen

ghariq-e-warta-e-gham kab kinare par nikalte hain

jo aagah-e-rumuz-e-zindagi hain bazm-e-hasti mein

wo aksar aish mein bhi dard ke KHugar nikalte hain

charagh-e-rahbari hota hai har ek naqsh-e-pa jin ka

wo salik be-niyaz-e-jada-o-rahbar nikalte hain

wahi har ek jalwa mein tajalli-rez rahte hain

wahi har ek manzar mein pas-e-manzar nikalte hain

kisi ka naqsh-e-pa jab dawat-e-taslim deta hai

taDap kar sajda-ha-e-arzu bahar nikalte hain

'anis' ehsas-e-dard-o-fart-e-mayusi ko kya kahiye

ki ab aansu bhi meri aankh se kamtar nikalte hain