nigah koi to tufan mein mehrban si hai

nigāh koī to tūfāñ meñ mehrbān sī hai

har ek mauj samundar kī pā.edān sī hai

har ek shaḳhs ko gāhak samajh ke ḳhush rakhnā

ye zindagī bhī hamārī koī dukān sī hai

maiñ āsmāñ kī tarah muddatoñ se Thahrā huuñ

badan meñ phir bhī zamīñ jaisī kuchh thakān sī hai

dukhoñ kā kyā hai ye aate haiñ tiir kī mānind

ḳhushī hamesha mire vāste kamān sī hai

qadam sambhāl ke rakhnā hasīn rāhoñ par

phisal ga.e to phir aage baḌī Dhalān sī hai

zabān muñh meñ hamāre thī jab ġhulām the ham

hamāre muñh meñ magar ab to bas zabān sī hai

ab aa.e din hī nikaltā hai āñsuoñ kā julūs

hamārī aañkh musalsal lahūluhān sī hai

nigah koi to tufan mein mehrban si hai

har ek mauj samundar ki paedan si hai

har ek shaKHs ko gahak samajh ke KHush rakhna

ye zindagi bhi hamari koi dukan si hai

main aasman ki tarah muddaton se Thahra hun

badan mein phir bhi zamin jaisi kuchh thakan si hai

dukhon ka kya hai ye aate hain tir ki manind

KHushi hamesha mere waste kaman si hai

qadam sambhaal ke rakhna hasin rahon par

phisal gae to phir aage baDi Dhalan si hai

zaban munh mein hamare thi jab ghulam the hum

hamare munh mein magar ab to bas zaban si hai

ab aae din hi nikalta hai aansuon ka julus

hamari aankh musalsal lahuluhan si hai