nigah mujhse milane ki un mein tab nahin

nigāh mujh se milāne kī un meñ taab nahīñ

mere savāl kā shāyad koī javāb nahīñ

bahut dinoñ se koī dil meñ iztirāb nahīñ

samāyā āñkhoñ meñ ab aur koī ḳhvāb nahīñ

mirī anā to abhī sar-buland hai mujh meñ

mujhe shikast bhī de kar vo kāmyāb nahīñ

ḳhudā kā shukr hai sharm-o-hayā salāmat hai

vo ā.īna hai magar maiñ bhī be-hijāb nahīñ

bahār aane ko aa.ī samāñ nahīñ badlā

khile hai ḳhaar har ik shāḳh par gulāb nahīñ

yahāñ dimāġh nahīñ dil kī hotī hai ta.alīm

huzūr-e-ishq ke maktab kā kuchh nisāb nahīñ

hijāb meñ hai har ik raaz merī hastī kā

zamāna shauq se paḌh le ye vo kitāb nahīñ

koī batā.e ki sambhleñ to kis tarah sambhleñ

milī haiñ Thokareñ itnī ki kuchh hisāb nahīñ

haañ mere fan se munavvar hai ik jahāñ lekin

maiñ ek zarra-e-ḳhākī huuñ āftāb nahīñ

'siyā' sukūn se baaqī hai jo guzar jaa.e

ab aur rañj sahūñ itnī mujh meñ taab nahīñ

nigah mujh se milane ki un mein tab nahin

mere sawal ka shayad koi jawab nahin

bahut dinon se koi dil mein iztirab nahin

samaya aankhon mein ab aur koi KHwab nahin

meri ana to abhi sar-buland hai mujh mein

mujhe shikast bhi de kar wo kaamyab nahin

KHuda ka shukr hai sharm-o-haya salamat hai

wo aaina hai magar main bhi be-hijab nahin

bahaar aane ko aai saman nahin badla

khile hai KHar har ek shaKH par gulab nahin

yahan dimagh nahin dil ki hoti hai talim

huzur-e-ishq ke maktab ka kuchh nisab nahin

hijab mein hai har ek raaz meri hasti ka

zamana shauq se paDh le ye wo kitab nahin

koi batae ki sambhlen to kis tarah sambhlen

mili hain Thokaren itni ki kuchh hisab nahin

han mere fan se munawwar hai ek jahan lekin

main ek zarra-e-KHaki hun aaftab nahin

'siya' sukun se baqi hai jo guzar jae

ab aur ranj sahun itni mujh mein tab nahin