nigah-o-dida-o-dil ki pareshani nahin jati

nigāh-o-dīda-o-dil kī pareshānī nahīñ jaatī

palaT kar apnī marzī se ye tuġhyānī nahīñ jaatī

agarche ek muddat ho ga.ī tark-e-ta.alluq ko

pashemān-e-mohabbat kī pashemānī nahīñ jaatī

maqām aise bhī aate haiñ bashar kī zindagānī meñ

jahāñ jahd-o-amal kī ek bhī maanī nahīñ jaatī

zarā sī chuuk ho jaa.e to bulbul jaan se jaa.e

ḳhatā ahl-e-chaman se ho to gardānī nahīñ jaatī

kahāñ par lā ke chhoḌā hai mujhe ai gardish-e-daurāñ

ki ḳhud apnī hī sūrat aap pahchānī nahīñ jaatī

nahīñ jaatī mire dil ke nihāñ-ḳhānoñ se vīrānī

mire saudā-e-vahshat kī bayābānī nahīñ jaatī

na jaane aur kyā kyā gul khilā.e aarzū merī

mire zauq-e-nazar kī fitna-sāmānī nahīñ jaatī

ye kis sannā.a ke hāthoñ ne Dhālā hai tirā paikar

ki chashm-e-shauq-e-nazzāra kī hairānī nahīñ jaatī

burā.ī 'shaiḳh' piine meñ nahīñ par ik qabāhat hai

purānī ho ke ye aadat ba-āsānī nahīñ jaatī

nigah-o-dida-o-dil ki pareshani nahin jati

palaT kar apni marzi se ye tughyani nahin jati

agarche ek muddat ho gai tark-e-talluq ko

pasheman-e-mohabbat ki pashemani nahin jati

maqam aise bhi aate hain bashar ki zindagani mein

jahan jahd-o-amal ki ek bhi mani nahin jati

zara si chuk ho jae to bulbul jaan se jae

KHata ahl-e-chaman se ho to gardani nahin jati

kahan par la ke chhoDa hai mujhe ai gardish-e-dauran

ki KHud apni hi surat aap pahchani nahin jati

nahin jati mere dil ke nihan-KHanon se virani

mere sauda-e-wahshat ki bayabani nahin jati

na jaane aur kya kya gul khilae aarzu meri

mere zauq-e-nazar ki fitna-samani nahin jati

ye kis sannaa ke hathon ne Dhaala hai tera paikar

ki chashm-e-shauq-e-nazzara ki hairani nahin jati

burai 'shaiKH' pine mein nahin par ek qabahat hai

purani ho ke ye aadat ba-asani nahin jati