nigah-o-dil ka afsana qarib-e-iKHtitam aaya

nigāh-o-dil kā afsāna qarīb-e-iḳhtitām aayā

hameñ ab is se kyā aa.ī sahar yā vaqt-e-shām aayā

zabān-e-ishq par ik chīḳh ban kar terā naam aayā

ḳhirad kī manzileñ tai ho chukīñ dil kā maqām aayā

uThānā hai jo patthar rakh ke siine par vo gaam aayā

mohabbat meñ tirī tark-e-mohabbat kā maqām aayā

ise aañsū na kah ik yād-e-ayyām-e-guzishta hai

mirī umr-e-ravāñ ko umr-e-rafta kā salām aayā

zarā lau aur dil kī tez kar siilā sā ye sho.ala

na raushan kar sakā ghar ko na mahfil hī ke kaam aayā

mukammal tabsira kartā huā ayyām-e-rafta par

nigāh-e-be-suḳhan meñ ek ashk-e-be-kalām aayā

tavānā ko bahāna chāhiye shāyad tashaddud ko

phir ik majbūr par shorīdgī kā ittihām aayā

na jaane kitnī sham.eñ gul huiiñ kitne bujhe taare

tab ik ḳhurshīd itrātā huā bālā-e-bām aayā

barahman āb-e-gañgā shaiḳh kausar le uḌā us se

tire hoñToñ ko jab chhūtā huā 'mullā' kā jaam aayā

nigah-o-dil ka afsana qarib-e-iKHtitam aaya

hamein ab is se kya aai sahar ya waqt-e-sham aaya

zaban-e-ishq par ek chiKH ban kar tera nam aaya

KHirad ki manzilen tai ho chukin dil ka maqam aaya

uThana hai jo patthar rakh ke sine par wo gam aaya

mohabbat mein teri tark-e-mohabbat ka maqam aaya

ise aansu na kah ek yaad-e-ayyam-e-guzishta hai

meri umr-e-rawan ko umr-e-rafta ka salam aaya

zara lau aur dil ki tez kar sila sa ye shoala

na raushan kar saka ghar ko na mahfil hi ke kaam aaya

mukammal tabsira karta hua ayyam-e-rafta par

nigah-e-be-suKHan mein ek ashk-e-be-kalam aaya

tawana ko bahana chahiye shayad tashaddud ko

phir ek majbur par shoridgi ka ittiham aaya

na jaane kitni shamen gul huin kitne bujhe tare

tab ek KHurshid itraata hua baala-e-baam aaya

barahman aab-e-ganga shaiKH kausar le uDa us se

tere honTon ko jab chhuta hua 'mulla' ka jam aaya