nigah-o-dil ka afsana qarib-e-iKHtitam aaya

nigāh-o-dil kā afsāna qarīb-e-iḳhtitām aayā

hameñ ab is se kyā aa.ī sahar yā vaqt-e-shām aayā

zabān-e-ishq par ik chīḳh ban kar terā naam aayā

ḳhirad kī manzileñ tai ho chukīñ dil kā maqām aayā

uThānā hai jo patthar rakh ke siine par vo gaam aayā

mohabbat meñ tirī tark-e-mohabbat kā maqām aayā

use aañsū na kah ik yād-e-ayyām-e-guzishta hai

mirī umr-e-ravāñ ko umr-e-rafta kā salām aayā

zarā lau aur dil kī tez kar siilā sā ye sho.ala

na raushan kar sakā ghar ko na mahfil hī ke kaam aayā

nizām-e-mai-kada saaqī badalne kī zarūrat hai

hazāroñ haiñ safeñ jin meñ na mai aa.ī na jaam aayā

abhī tak said-e-yazdāñ-o-sanam aulād-e-ādam hai

bashar insāñ nahīñ rahtā jahāñ īmāñ kā naam aayā

bahār aate hī ḳhūñ-rezī huī vo sehn-e-gulshan meñ

ḳhajil kāñTe the yuuñ phūloñ ko josh-e-intiqām aayā

bhulā.e ābla-pāoñ ko baiThe the chaman vaale

garajtī āñdhiyāñ aa.iiñ ki sahrā kā salām aayā

sahar kī huur ke kyā kyā ne dekhe ḳhvāb duniyā ne

magar ta.abīr jab DhūñDī vahī ifrīt-e-shām aayā

kabhī shāyad usī se rañg-e-firdaus-e-bashar paa.e

abhī tak to lahū insāñ kā shaitāñ hī ke kaam aayā

mukammal tabsira kartā huā ayyām-e-rafta par

nigāh-e-be-suḳhan meñ ek ashk-e-be-kalām aayā

tavānā ko bahāna chāhiye shāyad tashaddud kā

phir ik majbūr par shorīdgī kā ittihām aayā

na jaane kitnī sham.eñ gul huiiñ kitne bujhe taare

tab ik ḳhurshed itrātā huā bālā-e-bām aayā

barahman āb-e-gañgā shaiḳh kausar le uḌā is se

tire hoñToñ ko jab chhūtā huā 'mullā' kā jaam aayā

nigah-o-dil ka afsana qarib-e-iKHtitam aaya

hamein ab is se kya aai sahar ya waqt-e-sham aaya

zaban-e-ishq par ek chiKH ban kar tera nam aaya

KHirad ki manzilen tai ho chukin dil ka maqam aaya

uThana hai jo patthar rakh ke sine par wo gam aaya

mohabbat mein teri tark-e-mohabbat ka maqam aaya

use aansu na kah ek yaad-e-ayyam-e-guzishta hai

meri umr-e-rawan ko umr-e-rafta ka salam aaya

zara lau aur dil ki tez kar sila sa ye shoala

na raushan kar saka ghar ko na mahfil hi ke kaam aaya

nizam-e-mai-kada saqi badalne ki zarurat hai

hazaron hain safen jin mein na mai aai na jam aaya

abhi tak said-e-yazdan-o-sanam aulad-e-adam hai

bashar insan nahin rahta jahan iman ka nam aaya

bahaar aate hi KHun-rezi hui wo sehn-e-gulshan mein

KHajil kanTe the yun phulon ko josh-e-intiqam aaya

bhulae aabla-paon ko baiThe the chaman wale

garajti aandhiyan aain ki sahra ka salam aaya

sahar ki hur ke kya kya ne dekhe KHwab duniya ne

magar tabir jab DhunDi wahi ifrit-e-sham aaya

kabhi shayad usi se rang-e-firdaus-e-bashar pae

abhi tak to lahu insan ka shaitan hi ke kaam aaya

mukammal tabsira karta hua ayyam-e-rafta par

nigah-e-be-suKHan mein ek ashk-e-be-kalam aaya

tawana ko bahana chahiye shayad tashaddud ka

phir ek majbur par shoridgi ka ittiham aaya

na jaane kitni shamen gul huin kitne bujhe tare

tab ek KHurshed itraata hua baala-e-baam aaya

barahman aab-e-ganga shaiKH kausar le uDa is se

tere honTon ko jab chhuta hua 'mulla' ka jam aaya