nigah o dil ke tamam rishte faza-e-alam se kaT gae hain

nigāh o dil ke tamām rishte fazā-e-ālam se kaT ga.e haiñ

judā.iyoñ ke azaab mausam bisāt-e-hastī ulaT ga.e haiñ

vo jis kī yādoñ se shā.erī kā har ek misra sajāyā ham ne

kitāb-e-jāñ ke tamām safhe usī ke hāthoñ se phaT ga.e haiñ

yahāñ pe kuchh bhī nahīñ hai baaqī tū aks apnā talāsh mat kar

mirī nigāhoñ ke aa.ine ab ġhubār-e-furqat se aT ga.e haiñ

yahī asāsa the zindagī kā ye ḳhvāb hī the mirā sahārā

tire taġhāful ke sañg-rezo se kirchiyoñ meñ jo baT ga.e haiñ

ye mo.ajaza to nahīñ hai koī ḳhirāj hai apnī himmatoñ kā

ki apne raste meñ aane vaale tamām kohsār hiT ga.e haiñ

ḳhush aa gayā hai safar meñ jiinā isī liye to shakīl-'jāzib'

jahāñ se manzil qarīb dekhī vahīñ se vāpas palaT ga.e haiñ

nigah o dil ke tamam rishte faza-e-alam se kaT gae hain

judaiyon ke azab mausam bisat-e-hasti ulaT gae hain

wo jis ki yaadon se shaeri ka har ek misra sajaya hum ne

kitab-e-jaan ke tamam safhe usi ke hathon se phaT gae hain

yahan pe kuchh bhi nahin hai baqi tu aks apna talash mat kar

meri nigahon ke aaine ab ghubar-e-furqat se aT gae hain

yahi asasa the zindagi ka ye KHwab hi the mera sahaara

tere taghaful ke sang-rezo se kirchiyon mein jo baT gae hain

ye moajaza to nahin hai koi KHiraj hai apni himmaton ka

ki apne raste mein aane wale tamam kohsar hiT gae hain

KHush aa gaya hai safar mein jina isi liye to shakil-'jazib'

jahan se manzil qarib dekhi wahin se wapas palaT gae hain