نگاہ تھی مجھے حاصل تو وہ نظارا تھا

نگاہ تھی مجھے حاصل تو وہ نظارا تھا

ہر ایک شے میں نیا ایک استعارہ تھا

مرے سفینے کو دریا نے کب دیا رستہ

وہیں بھنور بھی تھا یارو جہاں کنارا تھا

اسی نے آج انہیں بے سہارا چھوڑ دیا

وہ ایک بیٹا جو ماں باپ کا سہارا تھا

تمہارے غم نے مرتب کیا محبت سے

وگرنہ یہ ورق دل تو پارہ پارہ تھا

ہماری ہمتیں دیکھو کیا وہی سودا

وفا کا سودا جو سب سے بڑا خسارہ تھا

اسے ہرا دیا پتوں کی بے وفائی نے

وہ ایک پیڑ ہواؤں سے جو نہ ہارا تھا

ڈرا دیا ہے نیازؔ آنسوؤں نے ظلمت کو

نہ میری پلکوں پہ جگنو تھا نے ستارا تھا