nigah thi mujhe hasil to wo nazara tha

nigāh thī mujhe hāsil to vo nazārā thā

har ek shai meñ nayā ek isti.āra thā

mire safīne ko dariyā ne kab diyā rasta

vahīñ bhañvar bhī thā yaaro jahāñ kinārā thā

usī ne aaj unheñ be-sahārā chhoḌ diyā

vo ek beTā jo māñ-bāp kā sahārā thā

tumhāre ġham ne murattab kiyā mohabbat se

vagarna ye varaq-e-dil to pāra-pāra thā

hamārī himmateñ dekho kiyā vahī saudā

vafā kā saudā jo sab se baḌā ḳhasāra thā

use harā diyā pattoñ kī bevafā.ī ne

vo ek peḌ havāoñ se jo na haarā thā

Darā diyā hai 'niyāz' āñsūoñ ne zulmat ko

na merī palkoñ pe jugnū thā nai sitārā thā

nigah thi mujhe hasil to wo nazara tha

har ek shai mein naya ek istiara tha

mere safine ko dariya ne kab diya rasta

wahin bhanwar bhi tha yaro jahan kinara tha

usi ne aaj unhen be-sahaara chhoD diya

wo ek beTa jo man-bap ka sahaara tha

tumhaare gham ne murattab kiya mohabbat se

wagarna ye waraq-e-dil to para-para tha

hamari himmaten dekho kiya wahi sauda

wafa ka sauda jo sab se baDa KHasara tha

use hara diya patton ki bewafai ne

wo ek peD hawaon se jo na haara tha

Dara diya hai 'niyaz' aansuon ne zulmat ko

na meri palkon pe jugnu tha nai sitara tha