nigah yun bhi na Thahre ki dard-e-sar ban jae

nigāh yuuñ bhī na Thahre ki dard-e-sar ban jaa.e

ye sang-e-chashm kisī Dhab se ab guhar ban jaa.e

kamāl-e-kūza-garī hai ki maiñ jise sochūñ

vo naqsh chaak pe aane se peshtar ban jaa.e

jadīd ahd meñ ulTā hai irtiqā kā safar

ajab nahīñ hai phir insān jānvar ban jaa.e

maiñ chāhtā huuñ ki chiknī chaTān par hī chalūñ

ye kyā ba.iid mire baad rahguzar ban jaa.e

bahut nahīf nahīñ hai giraft-e-halqa-e-chashm

nazar uThe to zamāne kī jaan par ban jaa.e

nigah yun bhi na Thahre ki dard-e-sar ban jae

ye sang-e-chashm kisi Dhab se ab guhar ban jae

kamal-e-kuza-gari hai ki main jise sochun

wo naqsh chaak pe aane se peshtar ban jae

jadid ahd mein ulTa hai irtiqa ka safar

ajab nahin hai phir insan jaanwar ban jae

main chahta hun ki chikni chaTan par hi chalun

ye kya baid mere baad rahguzar ban jae

bahut nahif nahin hai giraft-e-halqa-e-chashm

nazar uThe to zamane ki jaan par ban jae