nigahen pher kar apni KHudi se

nigāheñ pher kar apnī ḳhudī se

rahe ik umr ḳhud meñ ajnabī se

ta.alluq kyā mirā ġham aur ḳhushī se

shikāyat hī nahīñ ham ko kisī se

qazā ke dar pe dastak dene vaalā

bahut kuchh chāhtā thā zindagī se

visāl-o-hijr kā ehsās kaisā

sabhī ham se mile haiñ ajnabī se

ḳhabar tum ko nahīñ yāroñ ki maiñ ne

liyā hai kaam kitnā be-hisī se

na jaane kis se kahnā chāhtā huuñ

vo bāteñ jo nahīñ kahtā kisī se

hai dil meñ dafn ashkoñ kā samundar

badan ko aag lagtī hai namī se

añdheroñ se nibhānā chāhtā huuñ

vo rishta jo kabhī thā raushnī se

nigahen pher kar apni KHudi se

rahe ek umr KHud mein ajnabi se

talluq kya mera gham aur KHushi se

shikayat hi nahin hum ko kisi se

qaza ke dar pe dastak dene wala

bahut kuchh chahta tha zindagi se

visal-o-hijr ka ehsas kaisa

sabhi hum se mile hain ajnabi se

KHabar tum ko nahin yaron ki main ne

liya hai kaam kitna be-hisi se

na jaane kis se kahna chahta hun

wo baaten jo nahin kahta kisi se

hai dil mein dafn ashkon ka samundar

badan ko aag lagti hai nami se

andheron se nibhana chahta hun

wo rishta jo kabhi tha raushni se