nigahon ko zaban karna KHamoshi ko bayan karna

nigāhoñ ko zabāñ karnā ḳhamoshī ko bayāñ karnā

ayaañ karnā bhī rāz-e-dil kabhī to yuuñ ayaañ karnā

havā-e-sūd meñ rahnā na parvā-e-ziyāñ karnā

haqīqat meñ hai sāmān-e-nashāt-e-jāvedāñ karnā

kashīda ho ga.e tum jab kashish sābit huī dil kī

samajh kar chāhiye thā jazb-e-dil kā imtihāñ karnā

vafā kā zikr ḳhud karnā ḳhilāf-e-rasm-e-ulfat hai

subuk ho kar na pesh-e-dost bār-e-ġham-garāñ karnā

ba-īñ be-dast-o-pā.ī mil bhī jā.egā to kyā hogā

abas hai fikr-e-manzil meñ talāsh-e-kārvāñ karnā

mujhe terī razā marġhūb thī varna na thā mumkin

jafā-e-dostāñ sahnā sanā-e-dushmanāñ karnā

unheñ zid hai ki haiñ āzurda mujh se be-sabab varna

nahīñ hai jurm kuchh zikr-e-jafā-e-āsmāñ karnā

sar-e-mimbar hai vaa.iz mo'tariz kyoñ but-parastī par

yahāñ lāzim nahīñ mard-e-ḳhudā zikr-e-butāñ karnā

kisī kā raaz itnā qīmtī thā qalb-e-'beḳhud' meñ

ḳhamoshī ko zarūrī ho gayā qufl-e-dahāñ karnā

nigahon ko zaban karna KHamoshi ko bayan karna

ayan karna bhi raaz-e-dil kabhi to yun ayan karna

hawa-e-sud mein rahna na parwa-e-ziyan karna

haqiqat mein hai saman-e-nashat-e-jawedan karna

kashida ho gae tum jab kashish sabit hui dil ki

samajh kar chahiye tha jazb-e-dil ka imtihan karna

wafa ka zikr KHud karna KHilaf-e-rasm-e-ulfat hai

subuk ho kar na pesh-e-dost bar-e-gham-garan karna

ba-in be-dast-o-pai mil bhi jaega to kya hoga

abas hai fikr-e-manzil mein talash-e-karwan karna

mujhe teri raza marghub thi warna na tha mumkin

jafa-e-dostan sahna sana-e-dushmanan karna

unhen zid hai ki hain aazurda mujh se be-sabab warna

nahin hai jurm kuchh zikr-e-jafa-e-asman karna

sar-e-mimbar hai waiz mo'tariz kyon but-parasti par

yahan lazim nahin mard-e-KHuda zikr-e-butan karna

kisi ka raaz itna qimti tha qalb-e-'beKHud' mein

KHamoshi ko zaruri ho gaya qufl-e-dahan karna