nigahon mein iqrar sare hue hain

nigāhoñ meñ iqrār saare hue haiñ

ham un ke hue vo hamāre hue haiñ

jin āñkhoñ meñ aañsū chakāre hue haiñ

ham un kī nigāhoñ ke maare hue haiñ

na ḳhaTkeñ kaho kis tarah tīr-e-mizhgāñ

jigar par hamāre utāre hue haiñ

jhaḌe jo tirī kafsh-e-zarrīñ ke zarre

falak par vo jā kar sayyāre hue haiñ

'abas jaan detī hai bulbul guloñ par

ye us ruḳh ke sadqe utāre hue haiñ

kis andāz se band-e-mahram kase haiñ

ki joban ko un ke ubhāre hue haiñ

yaqīñ hai balā ho koī aaj nāzil

vo bāloñ ko apne sañvāre hue haiñ

ḳhabar-dār hāthoñ se jaane na paa.eñ

ye duzd-e-hinā maal maare hue haiñ

kahe detī haiñ saaf āñkheñ tumhārī

kisī ġhair se kuchh ishāre hue haiñ

maiñ mañjdhār meñ Dūbtā huuñ ilāhī

vo dil le ke merā kināre hue haiñ

hamesha jo bharte the dam dostī kā

vahī dushman-e-jāñ hamāre hue haiñ

nazar kar du'ā par ḳhudāvand-e-ālam

ki ham haath apne pasāre hue haiñ

bhalā ġhair kī is meñ hai kyā shikāyat

vahī dushman-e-jāñ hamāre hue haiñ

unheñ ham ne nahlā diyā de ke chhīñTeñ

'ajab lutf dariyā kināre hue haiñ

ḳhabar āmad-e-gul kī shāyad hai 'āġhā'

chaman saare jhāḌe bahāre hue haiñ

nigahon mein iqrar sare hue hain

hum un ke hue wo hamare hue hain

jin aankhon mein aansu chakare hue hain

hum un ki nigahon ke mare hue hain

na KHaTken kaho kis tarah tir-e-mizhgan

jigar par hamare utare hue hain

jhaDe jo teri kafsh-e-zarrin ke zarre

falak par wo ja kar sayyare hue hain

'abas jaan deti hai bulbul gulon par

ye us ruKH ke sadqe utare hue hain

kis andaz se band-e-mahram kase hain

ki joban ko un ke ubhaare hue hain

yaqin hai bala ho koi aaj nazil

wo baalon ko apne sanware hue hain

KHabar-dar hathon se jaane na paen

ye duzd-e-hina mal mare hue hain

kahe deti hain saf aankhen tumhaari

kisi ghair se kuchh ishaare hue hain

main manjdhaar mein Dubta hun ilahi

wo dil le ke mera kinare hue hain

hamesha jo bharte the dam dosti ka

wahi dushman-e-jaan hamare hue hain

nazar kar du'a par KHudawand-e-alam

ki hum hath apne pasare hue hain

bhala ghair ki is mein hai kya shikayat

wahi dushman-e-jaan hamare hue hain

unhen hum ne nahla diya de ke chhinTen

'ajab lutf dariya kinare hue hain

KHabar aamad-e-gul ki shayad hai 'agha'

chaman sare jhaDe bahaare hue hain