nigahon se meri nigahen bachae

nigāhoñ se merī nigāheñ bachā.e

chale aa rahe haiñ vo tūfāñ uThā.e

lahū dil kā ashkoñ meñ kyuuñ aa na jaa.e

kahāñ tak koī rāz-e-ulfat chhupā.e

usī kī hai duniyā usī kā zamāna

jo sab kuchh haTā kar kabhī kuchh na paa.e

abhī kuchh hai baaqī nishān-e-nasheman

kaho barq se aur abhī zulm Dhaa.e

chale ā.eñge ḳhud vo betāb ho kar

junūn-e-mohabbat mirā baḌh to jaa.e

nirāle haiñ rasm-o-rivāj-e-mohabbat

vahī paar hotā hai jo Duub jaa.e

rahā ek aalam na 'iqbāl' apnā

kabhī ro diye to kabhī muskurā.e

nigahon se meri nigahen bachae

chale aa rahe hain wo tufan uThae

lahu dil ka ashkon mein kyun aa na jae

kahan tak koi raaz-e-ulfat chhupae

usi ki hai duniya usi ka zamana

jo sab kuchh haTa kar kabhi kuchh na pae

abhi kuchh hai baqi nishan-e-nasheman

kaho barq se aur abhi zulm Dhae

chale aaenge KHud wo betab ho kar

junun-e-mohabbat mera baDh to jae

nirale hain rasm-o-riwaj-e-mohabbat

wahi par hota hai jo Dub jae

raha ek aalam na 'iqbaal' apna

kabhi ro diye to kabhi muskurae